مطعم سمسم

مطعم سمسم

التقرير الأول لمشاركة المتابعين

تقييمي اليوم لمطعم سمسم تقاطع الروضة مع الامير سلطان رحنا الساعه 10 مساء
انا حامل وكنت متوحمه على تبولة حامضة و اقترح زوجي المطعم اللبناني سمسم

انا احب المطاعم اللي يكون حولينها حياه و ازعاج ما احب الاماكن المنعزلة و كان فيه مجمع جلسات خارجية والناس تضحك ومبسوطه حبيت المكان

دخلنا المطعم كان واسع وكبير والديكور يفتح النفس وفيه جدار كلو اجهزة قديمه وكتب وطرابيش حمرا وطاولات كثيرة وقريبة من بعض ولكن كان فاضي تقريبا كلنا 5 عوائل

المينيو كان مليان صور حبيت ذا الشي وحسيت المنيو قليل وغير متنوع

طلباتنا:

بطاطس محمرة وتأكدت من الويتر اذا كانت سبايسي وأكدلي ذا الشي

للأسف كانت بطاطس مقليه مكعبات راشينها بشويا شيلي ومهي حارة وطعمها عادي جدا
6/10

تبولة بجبنه فيتا
او ماشفته مكتوب صارت عيوني قلوب وطول الوقت اتخيل تبولة حامضة وكمان جبنه فيتا تزيدها حموضة ولمن جا الطلب صوعقت
كانت سلطه خضرا مرشوش عليها شويا بقدونس مفروم مع قليل برغل
مره زعلت مكوناتها خس طماطم خيار فلفل رومي وجبنه فيتا

بس طعمها راضاني كان جيد جدا وحموضتها موزونه وحبيتها بس مو تبولة احلامي
تقيمي كتبولة 4/10 بس كسلطه 8/10

عرايس باللحم / طعمها لذيييذ ومهي مزيته واللحمه طعمها واضح وفرش ومعاها قطعتين بطاطس مشوية مره مره حبيتها ممكن ارجعلها .. 9/10
اخر شي ساندوتش دجاج ومعاه لازم نطلب طبقين طلبنا سلطه جرجير و بطاطس مقلية .. الساندوتش كان لذيذ جدا والصوص اللي مع الدجاج مرره طعم وفيه لذعه تخليك تاكل لقمه ثانية لكن مشكلته مفتوح من الجهتين صعبت عليا نفسي وانا احط مناديل واوازن الساندوتش .. 8/10 عشان مفتوح من الجهتين😂
سلطه الجرجير لا تمس لسلطه الجرجير بصله مجرد جرجير وبصل وزيت زيتون . انا اللي اعرفها عليها رمان و دبس الرمان طيب ع الاقل يحطون صوص مزبوط . للأسف ما اتأكلت 0/10

اخر شي المشروبات
مشروب الورد جدا لذيذ وبارد يبوس قلبك ويكمل طريقو
بيبسي
كان نفينا نذوق الحلا شكلو يشهي بس مافي مكان الحمدلله
الحساب / 198

هل ب ارجعله ؟ ايوا ان شاءالله بعطيه فرصة اتوقع انه فيه اشياء اطيب لان كل شي باين يفتح النفس ونظيف –

About the author

غارة

Leave a Comment