مطعم صيادية كراب هاوس

مطعم صيادية كراب هاوس

التقرير الأول لمشاركة المتابعين

حسابهم ع الانستغرام
@sayadiyahcrabhouse

عنوان:مطعم صيادية كراب هاوس
جدة – شارع صاري – بجوار بنك ساب .

من زمان و أنا أشوف هذا المكان و أقول في نفسي لازم أجربه بس ما تجي الفرصة المناسبة و لمن جات الفرصة قلت التجربة يبغالها مخمخة و تركيز و الواحد لازم يعرف إيش يطلب و من هنا بدأت الرحلة أول ما توصل المكان تشوف ثلاجة الأسماك الطازجة اللي هي صيد اليوم و قدامك لوحة الأسعار بالكيلو
وبعدها تشوف المنيو و تبدأ في اختيار طلباتك

وبالنسبة لي كانت اختياراتي كالتالي .
.

سلة جمبري : عندهم عرض انه تعبي الجمبري بنفسك وتختار حجم السلة اللي تبغاه ،، أنا أخدت السلة الصغيرة وعبيت فيها حوالي ٨ حبات جمبري و طلبتها تكون مقلية ،، ما أحكيلكم على الطعم الرهيب اللي جاني ،، خلطتهم رائعة و التتبيلة مبهرة تمام التمام
سعر السلة : ٨٤ ريال .
.

واخترت سمكة هامور : طلبتها تكون مقلية كمان و كان طعمها لذيذ
سعر السمكة : ٧٦ ريال – حسب الحجم و الوزن .
.

شوربة توم كراب : نفس موضوع التوم يوم بس هنا مسوينها بالكراب ،، وهي عبارة عن شوربة حارة محضرة بقطع الكراب و الأعشاب الآسيوية و الجمبري و الحبار ،، لذيذة بس حرارتها عالية
سعر الطلب : ٢٧ ريال .
.

سلة كراب : وبرضه هنا أخدت السلة الصغيرة و قدرت أحط فيها ٦ حبات كراب ( أبو مقص ) واخترتها بنفسي من الثلاجة و طلبت ثلاثة تكون مشوية و ثلاثة تكون مسلوقة ،، جات حسب الطلب و الطعم كان تمام و مافيه زفارة وهذا يدل على احترافية الطبخ العالية عندهم
سعر الطلب : ٧٥ ريال .
.

كوكيز كيك : وهو كان اختياري للحلا ،، لذيذ و الكوكيز لو كان طري كان حيطلع ألذ بكثير ،، العيب الوحيد فيه إنه كان قاسي نوعاً ما
سعر الطلب : ٣٢ ريال .
.

الخدمة ممتازة و عندهم قسم أفراد وكمان قسم عائلات
وخلال شهر أغسطس عندهم خصم ٢٥٪‏ للي يزورهم من الساعة ١ الظهر إلى الساعة ٦ المساء
ومسوين مسابقة رهيبة في حسابهم .
.
نشوفكم في تقرير قادم

Advertisement